تخلصي من الخطوط البيضاء للأبد!!!

سلام بنات وبنوتات شحوالكم وشخباركم؟؟


من زمان كنت متختخه ومتينه ولما ضعفت طلعت ليي في رجايلي وصدري واياديي بعد خطوط بيضان

طبعا ما اعتقد ان في احد ما يعرفهم

وطبعا ظليت اداور من مكان لمكان ما خليت شي زبده كاكو ,كريم بالمرز , هرار مرار كله تضييع البيزات والوقت والنتيجه ماهي سريعه ولاهي فعاله

وصادني اكتئاب اقول لروحي بعد للحين ما عرست ولا حملت وهالخطوط هالقد بعد وش بصير لو عرست

المهم في يوم من الايام دخلت منتدى ما اذكر وش اسمه وكان في وحده الله يجزيها خير قالت طريقه كلش بسيطه وبصراحه ما صدقت وقلت اكيد من ديليين الي يهرهرون وجدي بعدين قلت مدام اني جربت هالكريمات وما جفت نتيجه فعاله وعدله وش بيضرني لو جربت


ومن جربتها يا بنااااات مااااااا صدقت عيوني النتيجه طلعت ليي من ثالث يووووم الخطوط اختفت بنسبه 80% وكلما تواصلين عليها تشوفييين تغيراااات فعااااله

حتى راويت اختي واختي ما صدقت وسألتي واني اتعيزز واقول ليها اسراار ههههههه

وقلت لازم احطها وما ابي منكم الا انكم تدعون ليي يحقق الي في بالي يارب
المهم
استعملوا زيت الزيتون البكر وليفه خشنه (انتبهوا مو حجره) واحسن شي تكون من الخوص الي تقريبا سعرها 500 فلس

تقريبا لونها جديه




وطريقه الاستخدام هي انكم تحطون زيت الزيتون على المنطقه وتفركونها بالليفه بشكل دائري (عاد مو فراك الويل) افركوها بقوه متوسطه اهم شي تحفزون الدوره الدمويه في المنطقه وتردون تحطون زيت زيتون تالي انتظروا شوي لما تتشرب البشره الزيت وبعدين تلبسون ثياب قطنيه مريحه وتنامون


والله من جربتها واني موووووووووووو مصدقه الي صار



وانصحكم تجربونها لانها ما تكلف واجد وبسرعه بتشوفون النتائج